O condutor dun ciclomotor foi evacuado en helicóptero na tarde deste luns tras resultar ferido de gravidade nunha colisión frontolateral cun turismo en Val do Mao, no municipio do Incio.
O accidente produciuse algo despois do cinco da tarde á altura do quilómetro 7,400 da estrada LU-641, que comunica Castroncán e Toldaos.
O servizo de emerxencias 112 Galicia recibiu o aviso a través do 061 e mobilizou o helicóptero medicalizado con base en Ourense para trasladar o lesionado, un veciño de Samos de 47 anos. Ao lugar acudiron tamén a Garda Civil de Tráfico e os bombeiros do parque comarcal de Sarria, cuxa intervención non foi necesaria.
O ferido, único ocupante do ciclomotor, foi trasladado ao Hula.
