A empresa Espiña e Delfín iniciou as obras para renovar os servizos de saneamento e abastecemento de auga no tramo da Rúa Diego Pazos de Sarria comprendido entre a rúa Gregorio Fernández e o cruzamento da Ciguñeira. Tamén se remodelará unha beirarrúa e parte da outra.
Son uns 200 metros nos que se investirán 78.500 euros procedentes do plan único da Deputación do pasado ano, co obxectivo principal de emendar os problemas que presenta nesta zona a rede de servizos básicos.
O alcalde, Claudio Garrido, xustificou a necesidade desta actuación pola antigüidade da canalización, que fai "imprescindible" darlle unha solución. O seu escaso diámetro impide unha correcta evacuación da auga, razón pola cal se colocarán novas tubaxes de 600 milímetros.
A empresa atópase estes días instalando os condutos provisionais que darán servizo ás vivendas durante a duración das obras. Calcúlase que o groso dos traballos comezará a próxima semana, o que previsiblemente deixará inoperativo un dos carrís de circulación.
Espina e Delfín resultou adxudicataria desta mellora entre as 14 empresas presentadas ao concurso, ao ofertar un prazo de execución de 30 días fronte aos tres meses previstos no proxecto. Tamén rebaixou o orzamento inicial de 100.000 euros ata os 78.500 e ampliou a garantía en 50 meses.
A reposición de servizos en Diego Pazos comezou hai xa unha década coas axudas concedidas ao Concello para paliar os danos dos temporais do ano 2000. Co cambio de goberno en 2011, a actuación quedou paralizada á espera dun novo proxecto que non chegou a concretarse.
Agora continúase a obra con fondos do plan único que inicialmente ían destinados a corrixir as deficiencias dos traballos realizadas no tramo de Diego Pazos entre A Ciguñeira e A Avenida. Vecinos e comerciantes desta zona presentaron recentemente no Concello máis de 200 firmas instando ao seu arranxo, pero o goberno di que antes da súa execución reclamará responsabilidades á empresa e a dirección de obra.
