O conxunto escultórica Homenaxe ao Peregrino de Sarria, da María Carretero, figura nun censo de obras danadas do colectivo Vegap (Visual Entidade de Xestión de Artistas Plásticos), sociedade que representa en España máis de 100.000 artistas de todo o mundo para xestionar os seus dereitos de autor.
Carretero asegurou que a asociación enviou en 2020 un burofax ao alcalde e ao presidente da Confederación Hidrográfica do Miño-Sil (CHMS) "para mediar e poder arranxar esta situación amistosamente". "Como non tiveron a dignidade de contestar", engadiu, a obra foi incorporada ao censo, "ante a grave situación en que se atopa e presentada ante o ministro de Cultura para levala ao Congreso dos Deputados".
A escultora volveu denunciar "o estado lamentable e de abandono" do conxunto, que é "a vergoña do Xacobeo 2021-2022". Criticou que a situación se manteña a pesar das peticións realizadas ao Concello e a CHMS.
A sarriá mostrou tamén de novo a súa oposición á pasarela provisional da Ponte Ribeira, onde se sitúa a súa obra. Asegurou que se presenta a zona do conxunto dun xeito "totalmente desnaturalizado e denigrante, sen contar en absoluto" con ela, "vulnerando" todos os seus dereitos patrimoniais e sen reparar os "numerosos danos" ocasionados.
Denunciou que no lugar se pode ver un poste metálico de gran altura con cableado visible, publicidade nos farois e que dous monólitos foron movidos "en varias ocasións, sen permanecer na súa localización inicial".
Ademais, dixo que está pendente a restauración de todas as pezas do conxunto. "De ningún xeito as administracións poden obviar a obra artística existente e tratala coma se fose unha rúa corrente", opinou.
Homenaxe ao Peregrino celebra este ano o seu vixésimo sexto aniversario e Carretero anunciou que están programados actos culturais en fundacións públicas e privadas, coa participación de destacados relatores.
