SARRIA. O sarrián José Antonio Quiroga Sobrado acaba de dar un paso máis na súa filosofía de vivir «na arte» coa creación no centro da vila dun espazo dedicado a exposición e venda de obras, ademais de funcionar tamén como taller para os seus traballos.
Penetrado no mundo da escultura desde hai xa dez anos, Quiroga desenvolve esta iniciativa nun baixo no número 16 da rúa Matías López, enfronte da Unión. A parte artística está formada por unhas 70 obras da súa autoría, moitas delas elaboradas en distintas madeiras, pero tamén con outros materiais «e con fusión de metais, minerais e madeiras», as cales se prestan para outras exposicións. A maiores, o artista exhibe unha recompilación de libros e revistas que reflicten «a historia do século XX», explica.
Tras unha longa traxectoria laboral no mundo da hostalería e a construción, José Antonio Quiroga introduciuse na talla de madeira por afección e acabou descubrindo nela unha nova vocación. «Tomei clases e perfeccionei a técnica», comenta o autor, quen expuxo en lugares como a antiga prisión comarcal, o museo de Pallares, a sociedade A Unión, a casa da cultura de Sarria ou o Centro de Artesanía e Deseño de Lugo (Centrade).
O sarrián expón instalar en todos os concellos do Camiño Francés esculturas elaboradas coas partes metálicas do carro do país
O seu traballo como artista se caracteriza por utilizar elementos que atopa na natureza, algúns deles «tallados polo»tempo . «Non tería ningún sentido quitarlle a vida a unha árbore para facer estas obras cando existen moitas tiradas que se prestan para lestes traballos», defende o escultor, de cuxa autoría son tamén tres grandes pezas que locen no miradoiro da antiga prisión, onde son fotografadas por centos de peregrinos.
O Camiño Francés é, precisamente, o eixo central do seu próximo proxecto. Segundo relata, trátase dunha iniciativa ambiciosa con vistas á celebración do Ano Santo de 2021, consistente na colocación dunha escultura en cada un dos concellos galegos polos que discorre este itinerario.
O denominador común das pezas será «a utilización das partes metálicas das rodas do carro do país», material que emprega nas obras do miradoiro e que foi elixido porque «está correndo o risco de desaparecer». «Xa que non damos conservado ou carro, imos tratar de conservar as rodas», afirma Quiroga, que se atopa na fase, «nada sinxela», de provisión de material. Por iso, agradece a doazón de rodas de carro en desuso chamando ao 626.81.13.89 para contribuír con este proxecto.
