O Concello de Sarria e a agrupación cultural Ergueitas convocan a vixésima terceira edición do premio de poesía Fiz Vergara Vilariño, dotado con 6.000 euros e a publicación da obra gañadora por parte da editorial Espiral Maior.
O prazo de recepción de traballos abriu o pasado venres, 14, por un tempo de 60 días naturais, de modo que finalizará o 12 de xuño. As obras presentadas deben estar escritas en lingua galega e contar cunha extensión mínima de 500 versos. Os orixinais terán que ser inéditos e non premiados en ningún outro certame.
Os aspirantes enviarán os seus poemarios por correo certificado ao Concello de Sarria (Rúa Maior, número 14) por cuadriplicado e co nome do autor ou autora nun sobre pechado.
O xurado estará composto por "persoas de recoñecido prestixio no mundo da creación ou a crítica literaria", segundo recollen as bases, publicadas o Boletín Oficial da Provincia de Lugo.
Fallo do xurado
A concelleira de cultura e a presidenta de Ergueitas actuarán, respectivamente, como presidenta e secretaria do xurado, ambas con voz pero sen voto. O fallo darase a coñecer antes do 30 de decembro.
O premio Fiz Vergara, que homenaxea o poeta samonense do mesmo nome, recibiu na súa última edición un total de 67 traballos, entre os cales resultou elixido por unanimidade o poemario do monfortino Antón Lopo.
Hai só uns días tamén se presentou na casa da cultura de Sarria o libro gañador da vixésima primeira edición deste premio, Montaña Ioga, da autoría da coruñesa Lupe Gómez.