A localidade de Sarria situouse onte como "capital xurídica de España" coa celebración dunhas xornadas que reuniron a destacados maxistrados, fiscais e letrados para abordar os dereitos humanos, cuxa vulneración constitúe "un gravísimo problema social e xurídico", sinalaron.
O presidente do Tribunal Constitucional, Juan José González Rivas, inaugurou estas décimo terceiras Xornadas Xurídicas, que levan o nome de Román García Varela en recordo ao maxistrado sarrián que foi o seu gran artífice.
Durante o seu relatorio, González Rivas avogou por respectar a liberdade de crenzas e aplicar a "tolerancia e a convivencia pacífica tan necesitada neste momento histórico" como principais "antídotos" ante movementos xenófobos e "efluvios" de violencia, fanatismo e terrorismo.
Ademais, fixo un chamamento a todos os profesionais vinculados ao ámbito xudicial para "seguir propiciando a defensa, a práctica e o desenvolvemento dos dereitos fundamentais" para, deste xeito, "profundar nos valores do estado democrático de dereito".
O presidente do Constitucional estivo acompañado dos dous directores das xornadas, Román García-Varela Igrexas e Carlos Lema Devesa, quen reiteraron o seu "empeño" en que este foro teña recoñecemento académico.
García-Varela agradeceu, ademais, o "esforzo e o tesón" de varias persoas que coñeceron ao seu pai e fundador das xornadas, grazas ás cales é posible continuar co seu legado. A figura de Román García Varela pai foi tamén obxecto de recoñecemento por parte do alcalde de Sarria, Claudio Garrido, quen destacou "a enorme xenerosidade que sempre demostrou co pobo de Sarria", grazas á cal hoxe é posible celebrar estas xornadas que "contribúen ao prestixio" da vila.
No acto inaugural participaron, de igual modo, o vicepresidente da Xunta, Alfonso Rueda, quen expresou o "compromiso" do Goberno galego coa "modernización" da administración de xustiza, e o deputado Pablo Rivera, para quen os dereitos humanos "deben formar parte do leitmotiv da administración".
O primeiro día de relatorios contou co expresidente do Constitucional, Pascual Salga; o presidente da Audiencia Nacional, José Ramón Navarro; o expresidente da sala primeira do Supremo Ignacio Sierra; os maxistrados Cándido Conde Pumpido e Pedro José Vela; o coordinador de estranxeiría, Joaquín Sánchez-Covisa; o expresidente de sección do Tribunal Europeo de Dereitos Humanos, Luís López, e María Muñoz, da Oficina da Alta Comisionada das Nacións Unidas para os Dereitos Humanos.
Analizaron temas como a trata de seres humanos ou as migracións. Entre outros asuntos, abordaron a "relación entre a estranxeiría, normalmente en situación irregular, e as vítimas de trata", as desigualdades que crecen en situacións de crise económica ou a necesidade de avanzar na loita contra a explotación laboral.
Ás xornadas asistiron personalidades como a subdelegada do Goberno en Lugo, o presidente da Audiencia Provincial e membros do Foro Xurídico Sarriao. Hoxe serán clausuradas pola presidenta do Consello de Estado, María Teresa Fernández de la Vega, tras unha nova mesa redonda.
