Dúas promotoras construirán 51 pisos para aluguer social na localidade de Sarria, obras que se financian en virtude dun convenio co Ministerio de Fomento e a Xunta de Galicia ao amparo do Plan de Vivenda 2018-2021.
Unha das actuacións consistirá en renovar e finalizar un proxecto de construción de 40 vivendas xa iniciadas na Rúa Castelao. Os traballos teñen un custo de máis de 2,3 millóns de euros, dos que en axudas serán máis dun millón, achegados entre as dúas administracións. A empresa promotora financiará a contía restante.
As outras once vivendas situaranse na Rúa Frei Xoán, no barrio das Insuas. Neste caso trátase dunha nova construción. O proxecto conta cun orzamento de 480.000 euros. A Xunta e o Ministerio de Fomento contribuirán cun total de 215.000 euros, mentres que a construtora achegará o resto.
Unha vez finalizadas as obras, as vivendas disporanse en réxime de aluguer a prezo reducido durante un prazo mínimo de 25 anos. A estes pisos poderán acceder persoas e familias con ingresos que non superen 4,5 veces a contía do indicador público de renda de efectos múltiples (Iprem). Con todo, no caso de tratarse de familias numerosas e persoas con determinadas discapacidades, os ingresos máximos poderán chegar ata cinco veces o Iprem.
O convenio para executar estas vivendas na localidade de Sarria foi subscrito recentemente entre o Ministerio de Fomento, a Administración autonómica e o Concello. Os promotores recibirán as achegas entre 2020 e 2021. Para executar estas obras terán un prazo máximo de 30 meses desde a concesión das axudas, segundo figura na orde da convocatoria.
Este programa para fomentar o parque de vivendas en aluguer, do que tamén se beneficiaron outros concellos da comunidade, foi convocado por primeira vez este ano e ten como obxectivo pór a disposición dos cidadáns inmobles en arrendamento con mensualidades alcanzables.
Desta forma ampliarase a oferta de vivendas de aluguer na localidade de Sarria, onde caeu nos últimos tempos. Isto pode deberse á escaseza de construción, a cal se atopa estancada desde o ano 2007, e á proliferación de inmobles de uso turístico. A vila conta con ao redor dunha trintena de vivendas deste tipo, cuxos clientes son principalmente peregrinos que percorren o Camiño.
