A preocupación que xerou entre o empresariado sarrián a onda de roubos que afecta o municipio levoulle a dar un paso á fronte para estudar posibles medidas. O seu obxectivo non é outro que reivindicar unha vixilancia policial nocturna que manteña a localidade "cuberta" polas noites co número de efectivos que sexan necesarios.
Unha decena de roubos no prazo dun mes foi a pinga que colmou o vaso para que este luns convocasen unha reunión de afectados, á que acudiron unha ducia de empresarios de distintos sectores cuxos establecementos foron obxectivo dos ladróns no último ano, desde concesionarios de coches ata negocios de hostalería, estancos, tendas de telefonía móbil, oficinas ou comercios de roupa.
Durante o encontro, analizaron con preocupación e malestar a situación actual e informáronse incluso sobre a posibilidade de contratar pola súa conta vixilancia privada polas noites en caso de non obter resposta ás súas demandas por parte das autoridades competentes na materia.
Segundo manifestan, están "queimados" de ver como os seus negocios son asaltados e insisten en que a vixilancia policial nocturna "é un servizo que debemos ter" coas garantías necesarias.
O BNG levará unha moción ao pleno para que se convoquen catro prazas de policía local
A reunión contou coa presenza de dous concelleiros do BNG en Sarria, grupo este que, segundo din, se interesou pola problemática dos roubos. Tal e como acordaron, o primeiro paso será levar a través dos nacionalistas unha moción ao pleno deste xoves, ás 19.30 horas, instando o Concello a convocar catro prazas de policía local. Trátase de aumentar o número de efectivos para recuperar as quendas de noite -eliminados polo Concello en xaneiro de 2017 durante case toda a semana-, e facer fronte ás baixas, que nestes momentos afectan a seis axentes dun persoal de once máis catro auxiliares.
A sesión plenaria contará coa presenza dun grupo de afectados, que acudirá como público para seguir o debate.
De igual modo, o nacionalista Efrén Castro, quen tamén é deputado, comprometeuse cos empresarios a solicitar unha reunión coa subdelegada do Goberno en Lugo, á que acudirían varios destes emprendedores, para exporlle de primeira man a intranquilidade que existe na vila e reclamar máis patrullas da Garda Civil na zona.
