O presidente da Deputación de Lugo, Darío Campos, informou de que a institución provincial concedeulle unha axuda de 31.000 euros ao Concello de Triacastela para impulsar a creación dun centro de interpretación da Cova Eirós, un dos xacementos paleolíticos máis importantes do noroeste peninsular.
En declaracións aos medios de comunicación, Campos precisou que esta axuda da Deputación de Lugo servirá para "a redacción do proxecto museolóxico, que inclúe a elaboración dun catálogo, unha páxina web e guías da cova".
"Trátase de pór en valor este enclave excepcional", dixo Darío Campos, dado que é "a única cova con evidencias de ocupación de Homo Neardenthalis e Homo Sapiens da Península Ibérica".
Ademais, recordou o presidente da Deputación, "é un dos xacementos paleontolóxicos máis importantes de Europa para o estudo do oso das cavernas" e é o lugar onde se produciron os primeiros achados de arte "rupestre paleolítico do norte peninsular".
"A creación deste museo é unha vella demanda dos veciños de Triacastela", engadiu Campos, quen precisou que quedará instalado na Casona, un edificio que é propiedade do Xacobeo, que cederá unha parte do inmoble ao Concello para mostrar os achados realizados nese xacemento.
