miércoles. 26.01.2022 |
El tiempo
miércoles. 26.01.2022
El tiempo

Diocese, Concello e veciños axudarán a reconstruír a igrexa de Trascastro

La cubierta cayó sobre el altar mayor y dañó un retablo. AEP
A cuberta caeu sobre o altar maior e danou un retablo. AEP
Parte do tellado do templo do Incio esborrallouse en marzo As obras básicas custarán ao redor de 40.000 euros

A Diocese de Lugo, o Concello do Incio e os veciños de Trascastro colaborarán para reconstruír, polo menos no esencial, a igrexa desta parroquia, cuxo teito veu abaixo en parte o pasado mes de marzo sobre o altar maior, causando importantes danos, entre eles, nun retablo.

Segundo explicou o delegado de patrimonio de bens inmobles da Diocese, Miguel Gómez, esta entidade elaborou un proxecto de intervención na igrexa, o cal foi presentado a Patrimonio para solicitar os permisos necesarios. O documento contempla intervencións que, só no caso do presbiterio, terían un custo duns 40.000 euros, que se incrementarían ata 65.000 aproximadamente no suposto de actuar en toda a nave.

Segundo dixo, a intención do Obispado é facer fronte a estas obras coa axuda dos veciños e distintas administracións para "que estean resoltas de face ao inverno" polo menos na zona do presbiterio por ser a que máis urxe. Os traballos consistirían na consolidación dos muros, que están danados, reposición do teitume e limpeza do interior.

"Non imos deixar que caia", asegura o alcalde do Incio

O alcalde do Incio, Héctor Corujo, trasladou a predisposición do Concello a axudar dentro das súas posibilidades, para o que posiblemente teña que realizar unha modificación de crédito no orzamento e tendo en conta que corresponderá á Diocese asumir a maior parte da intervención. Sinalou tamén que xa houbo reunións con veciños, que se mostraron dispostos a colaborar con pequenas achegas.

O que está claro, asegurou, é que "se vai recuperar a igrexa". "Non imos deixar que caia", afirmou o alcalde, quen expresou "preocupación" polo acceso ao camposanto, dado que "non está en condicións" tras o derrube.

A caída do teito da igrexa produciuse o día 3 de marzo, momento no que os veciños ouviron un gran estrondo. O templo de Trascastro arrastraba un mal estado desde facía tempo, polo que se atopaba case sen uso, sendo só utilizado para funerais. As choivas e o vento puideron acelerar a deterioración, ocasionando o derrube sobre o altar maior e os danos nun dos retablos.

Diocese, Concello e veciños axudarán a reconstruír a igrexa de...
comentarios