A Garda Civil detivo a un dos tres supostos integrantes da banda que asaltou esta semana unha vivenda unifamiliar nunha urbanización da localidade lucense de Sarria, onde tres individuos retiveron aos dous menores que había no domicilio, de 11 e 8 anos de idade, mentres rexistraban a casa para facerse co diñeiro e as xoias.
Fontes da Benemérita confirmaron a Efe que o detido é o home que alugou a furgoneta na que se deron á fuga logo de perpetrar o roubo.
Trátase dun home novo, suramericano e veciño de Lugo, que permanece detido nas dependencias da Garda Civil de Lugo á espera do seu paso a disposición xudicial, mentres os encargados do caso proseguen coa investigación para identificar e deter aos demais membros da banda.
Segundo informou a alcaldesa da localidade, Pilar López, os feitos ocorreron pasadas as seis da tarde do pasado 12 de setembro, “a plena luz do día” e “nunha urbanización, non nunha casa illada”.
“Tres mozos, suramericanos ou afroamericanos, entraron na vivenda”, que é o domicilio dunha familia chinesa propietaria de dous bazares na localidade, “na que había dous pequenos”, segundo o seu relato.
A rexedora local precisou que os ladróns os retiveron nunha habitación do domicilio mentres rexistraban a casa para facerse cos obxectos de valor, pero aparte “do susto tremendo que levaron” non lles fixeron “ningún dano”.
