Un home 57 anos de idade e veciño de Lugo foi detido ao mediodía deste xoves en nbsp;& A Pobra de San Xiao (Láncara) como presunto autor do intento de atracado cometido uns minutos antes na sucursal bancaria de Caixa Rural
O suceso produciuse ás dúas da tarde, nun momento no que non había ningún cliente na entidade. O autor levaba lentes e gorra, unha funda de traballo e maquillaxe na cara para disimular as súas faccións. Dirixiuse á única empregada e, apuntándolle coa pistola, indicoulle que era un atraco e que estivese tranquila.
A muller, con gran estado de nerviosismo, non era capaz de marcar a clave do caixeiro automático e pediulle ao atracador que o fixese el. Mentres lle dicía os números que se lle viñan á cabeza aproveitou un descoido do home para fuxir e pedir axuda no bar Avenida, que se atopa alén da beirarrúa.
Entrou correndo no establecemento, dicindo que estaban a atracar o banco e que chamasen á Garda Civil. A responsable do bar telefonou de inmediato ao 112 mentres dous dos clientes saían tras o ladrón que, á súa vez, abandonara o banco sen levar ningún botín.
A colaboración destes dous veciños e a rápida intervención policial permitiu deter ao presunto autor nunha rúa paralela, logo de intentar fuxir por unhas leiras. Dous axentes da Garda Civil da Pobra de San Xiao, que acababan de finalizar a súa quenda de traballo, acudiron de inmediato vestidos de paisano e no coche particular dun deles, non sen antes coller as súas armas regulamentarias dado que a información que tiñan nese momento era que o atracador ía armado.
Puideron interceptalo e detelo tras ser identificado polas testemuñas. Adermás, recuperaron unha mochila que, na súa fuxida, lanzara debaixo dun coche e na que levaba a pistola utilizada no atraco, entre outros efectos.
Nas proximidades do lugar tamén tiña estacionado un vehículo, preparado para darse á fuga, pero xa non puido ao ser arrestado.
