O Concello de Sarria cortou o paso peonil da ponte do Mazadoiro, na estrada de Lugo a Monforte (LU-546), ante o mal estado no que se atopan as varandas e o risco que supón para os viandantes, explicou o concelleiro de seguridade cidadá, Félix Seijas. Os veciños dispoñen doutra ponte paralela.
Unha das varandas atópase dobrada desde principios do verán pola caída dunha rama durante a talla dunhas árbores. Tras un informe da arquitecta municipal, o Concello acordou cortar o paso peonil nas dúas marxes do viaduto, situado na entrada a Sarria desde Lugo. A Policía Local encargouse de sinalizar na mañá deste martes o peche do paso.
O Concello tamén deu traslado do estado no que se atopa as varandas á Xunta de Galicia, xa que é a administración titular da vía.
