A enfermeira Elvira López Mourín é a protagonista dun novo selo de Correos, que sae este venres. Así recorda a esta lancaresa que formou parte do primeiro transporte aéreo de persoal sanitario español da historia, que foi tamén o primeiro voo dunha muller sanitaria.
Correos emite o selo coincidindo co Ano Internacional das Enfermeiras e Matronas e ten como protagonista a Elvira López. Esta naceu en 1891 na parroquia de San Martiño de Río, segundo recollía hai uns meses José de Cora na sección El álbum de los lucenses deste diario.
A muller ingresa en 1918 no hospital da Cruz Vermella de Madrid, onde, xunto a outras catro compañeiras, formou parte da primeira promoción de enfermeiras profesionais desta entidade. Catro anos despois incorporouse ao hospital de Melilla.
No transcurso da Guerra do Rif, a finais de outubro e principios de novembro de 1922 recrudécense os ataques na zona de Tizzi Azza por unha ofensiva rifeña non esperada. Entón, o alto comisario de España en Marrocos, o xeneral Ricardo do Burguete, ordenou unha expedición con tres aeroplanos con material cirúrxico para atender aos centos de feridos.
VOLUNTARIA. Elvira López ofreceuse voluntaria a participar neste perigosa viaxe, xa que era un voo nocturno (un dos primeiros da aviación española), sobre territorio inimigo hostil e cunha aterraxe complicada.
A misión acabou sendo un éxito e pasou á historia, posto que foi o primeiro transporte aéreo de persoal sanitario en España e o primeiro dunha muller sanitaria.
Este acto de Elvira López valeulle o recoñecemento dos reis Afonso XIII e Vitoria Eugenia. O presidente do Consello de Ministros, José Sánchez Guerra, recibiu á lancaresa o 7 de novembro nunha audiencia e ofreceulle "unha alta recompensa honorífica". Uns días despois, o 11, Vitoria Eugenia deu unha recepción á enfermeira, á que xa enviara previamente un telegrama felicitándoa. O rei Afonso XIII tamén lle concedeu unha audiencia, que tivo lugar o día 20 dese mesmo mes no Palacio Real.
