A corporación municipal aprobou este xoves por unanimidade no pleno solicitar a creación en Sarria dun posto principal da Garda Civil, o que suporía, entre outras melloras, o incremento do número de axentes.
Este acordo tomouse por mor dunha moción do PP na que pediu que o Concello instale cámaras de seguridade e inste á Subdelegación do Goberno a aumentar os efectivos no cuartel. O edil de seguridade cidadá, Félix Seijas, propuxo unha emenda e modificar este último punto por demandar a creación do posto principal, o que aceptou o PP.
Esta categoría de cuartel permitiría contar con máis servizos de atención cidadá e pasar dos 21 axentes actuais a uns 60, explicou o edil. Desde el poderíase cubrir, dixo, toda a comarca. Considera que Sarria por entidade, "territorio, poboación e visitantes" debería contar cun posto principal, do que non existe ningún na provincia.
O portavoz do PP, José Antono García, denunciou a sensación de "inseguridade" dos cidadáns por roubos e pelexas nocturnas e solicitou que o goberno cumpra un acordo plenario de hai dous anos polo que se aprobou instalar cámaras de seguridade. Seijas defendeu que Sarria é "seguro" e afirmou que teñen a intención de colocar cámaras de tráfico, pero os trámites para facelo son "complexos" e teñen un custo de 250.000 "euros".
Pola súa banda, o portavoz do BNG, Efrén Castro, invitou a seguir avanzando en seguridade e a súa homóloga do PSOE, Pilar López, criticou que non estean máis avanzadas as xestións para as cámaras.
PP e PSOE acordan de novo paralizar o rénting da piscina
O pleno aprobou de novo paralizar o rénting do material para o ximnasio da piscina climatizada e a creación dunha comisión. Esta petición do PP saíu adiante cos votos deste grupo e o PSOE. Os nacionalistas abstivéronse e o goberno opúxose.
A moción xa foi aprobada polos mesmos partidos en xaneiro, pero, ao non cumprirse o acordo, os populares volvérona a levar a debate. García insistiu en que o rénting é unha operación "ruinosa" e supón un gasto "escandaloso". Acusou, ademais, ao goberno de "ocultar" os datos económicos da piscina, polo que pediu unha comisión. Para Castro deben abrirse as instalacións ao completo, co ximnasio, e Pilar López ve "estraño" que o segundo concurso do rénting quedase deserto.
O alcalde, Claudio Garrido, defendeu que buscan crear un ximnasio de "calidade" e que o sistema de rénting é "o mellor". Tamén negou falta de transparencia.
Ferrocarril
A corporación tamén deu luz verde a outra moción do BNG para solicitar melloras ferroviarias, petición que recibiu o apoio do goberno, mentres que PSOE e PP abstivéronse.