O contrato para as piscinas sae a licitación en 310.000 euros ao ano

O Concello Sarria acaba de sacar a licitación o contrato de servizos para a piscina climatizada por importe de 310.817 euros anuais (iva incluído) e un prazo de dous anos máis un terceiro de prórroga, o que fai un total de algo máis de 932.000 euros, nos que se inclúe a xestión das piscinas exteriores do Chanto.

As empresas interesadas en presentarse a este concurso poden formular as súas ofertas ata o día 15 de novembro. Ademais, o próximo 19 poderán visitar as instalacións da piscina cuberta, para o que deberán dirixir unha solicitude ao correo electrónico [email protected] o 18.

Tanto a piscina como o centro deportivo que nela funcionará –tamén está en proceso de contratación o equipamento do ximnasio cun renting por catro anos de 237.000 euros– serán de xestión directa do Concello mediante un contrato de servizos. A adxudicataria porá o persoal e encargarase da coordinación do servizo, limpeza, mantemento, vixilancia, atención e control de usuarios. A administración local, que conserva as facultades de inspección e supervisión, pagará por iso 310.817 euros ao ano, contía que as empresas poderán mellorar á baixa nas súas ofertas.

Segundo o estudo económico realizado polo Concello, o custo de persoal será de 95.228 euros ao ano, aos que se engaden outros 27.653 de material (limpeza, mantementos técnicos, analíticas...), 8.640 de gastos por servizos bancarios, xestorías ou seguros, e 2.000 doutros custos de explotación. Suman 233.521 que, unidos aos gastos xerais, beneficio industrial e Iva, alcanzan os 310.817 da licitación.

O principal ingreso que terá o Concello para custear esta cantidade cada ano serán as taxas dos usuarios. As tarifas pola piscina climatizada, aprobadas no verán de 2019, contemplan abonos mensuais que van desde 15 ata 42 euros, en función das idades e o número de membros da unidade familiar.

A existencia de déficit económico para as arcas municipais dependerá en gran medida do número de usuarios (as auditorías realizadas estimaban 900 socios) e da cantidade de servizos que utilicen, dado que coa equipamento do ximnasio deixará de ser só unha infraestrutura para a práctica de natación para converterse nun centro deportivo.

Os pregos que rexen este proceso de licitación obrigan ás empresas a ampliar os horarios con respecto aos actuais. Ademais, terán en conta as melloras que ofrezan neste aspecto e na xestión do centro deportivo.

á espera desta adxudicación, a piscina climatizada abre mañá cun contrato menor. Desde este luns xa se dispensan os abonos e foron moitos os veciños que se achegaron ao Concello para obter o carné de socio e informarse sobre os cursos.