A Audiencia Provincial de Lugo confirmou unha sentenza do xulgado do Penal número 1 condenando a un home a sete meses de prisión por un delito de resistencia á autoridade en Sarria e unha multa de dous meses cunha cota diaria de catro euros por outro leve de danos. O acusado foi absolto dun delito de atentando que tamén se lle imputaba.
Os feitos ocorreron sobre as 14.00 horas do 17 de xaneiro de 2017 na zona do Chanto. Axentes da Policía Local procederon á súa identificación logo de ser avisados de que estaba a alterar a orde pública. O acusado dirixiuse a eles "de forma agresiva, con insultos, e agarrou bruscamente" un deles, apunta a sentenza.
O home, que estaba baixo a influencia do alcol, tirou ao chan as lentes do policía e pisounas ata rompelas, chegando a arrincar os cristais ata deixalas totalmente inservibles". Por iso, tamén foi condenado a indemnizar ao axente con 239 euros polos danos nas lentes.
