O Concello de Sarria levará a pleno o vindeiro venres a aprobación dun recoñecemento extraxudicial de crédito por importe de 1.327.000 euros co fin de facer fronte ao pago de facturas correspondentes ao pasado ano.
Segundo o alcalde, Claudio Garrido, trátase de gastos realizados ao longo de 2018 que carecían de partida orzamentaria e que agora serán abonados con cargo ao remanente de tesosería.
Na listaxe figuran desde traballos de roza en pistas rurais ata investimentos en cultura ou gastos menores da administración municipal, sinalou. O grupo de goberno, de Camiña Sarria, xa avanzou que o seu voto irá na dirección de "garantir a aprobación destas facturas para que os provedores poidan cobrar".
En caso de ser aprobado o recoñecemento extraxudicial de crédito, os interesados aínda tardarán un tempo en ingresar o importe das facturas, dado que o acordo deberá ser sometido previamente a un período de exposición pública.
A sesión plenaria do venres, de carácter extraordinario e convocada para as 12.00 horas, servirá, de igual modo, para someter a votación dúas modificacións de crédito por un importe global de 1.270.000 euros para a súa incorporación ao orzamento do Concello de Sarria, tamén con fondos do remanente de tesourería.
Unha destas modificacións, de 129.000 euros, ten como fin dispor de orzamento para poder asumir nun futuro a compra da denominada Casa da Carmiña e doutro inmoble e un pequeno solar situados nas súas proximidades. Estas propiedades atópase lindeiras co consistorio sarrián, de aí o interese da administración local -en outubro de 2017 houbo xa un acordo plenario neste sentido- na súa adquisición para ampliar as dependencias municipais.
O groso da modificación servirá, segundo o rexedor, para afrontar gastos de persoal, entre os que se contan 434.000 euros que se incorporarán ao orzamento da residencia de maiores, preto de 400.000 para o servizo de axuda a domicilio e ao redor de 85.000 para a subida establecida por lei para os funcionarios.
Tamén figuran fondos para a piscina e para indemnizacións determinadas por sentenzas.
O pleno abordará, ademais, a nova proposta de salarios do grupo de goberno, que suman 76.650 euros, repartidos en 45.000 para o alcalde, 16.650 para a concelleira Geni Valcárcel e 15.000 para o edil Félix Seijas.
Tamén tratará a proposta do Administrador de Infraestruturas Ferroviarias (Adif) para suprimir 14 pasos a nivel en Sarria.
As comisións informativas do pleno celebráronse o martes e nelas estiveron presentes 13 edís despois de que nunha sesión anterior acordásese que formasen parte delas toda a corporación.
