O Concello de Sarria levantou este xoves a estrutura de madeira que colocara horas antes nun solar do cruzamento da Avenida tras recibir un escrito do propietario instando a paralizar os traballos por non ter autorización. A pretensión do Concello era instalar unhas letras co nome de Sarria e unha iluminación especial. Segundo o goberno, comezou a obra co permiso de Patrimonio e na crenza de que había unha cesión de terreos do anterior mandato pero, tras o requirimento do dono, retirouna.
O solar en cuestión pertence a unha entidade mercantil que hai anos planeaba levantar un edificio de vivendas neste punto e que en 2013 entrou en concurso voluntario de acredores. O administrador concursal nomeado entón polo xulgado ten como misión "velar polo estado dos bens da concursada" e, neste sentido, remitiu un escrito ao Concello instando a paralizar as obras iniciadas pola administración municipal esta semana. Segundo afirma, trátase duns traballos que carecen de autorización, polo que reclamou o cesamento do "uso non consentido" da propiedade e a reposición ao seu estado anterior.
"A fin de evitar a vía jurisdisccional correspondente, é dicir, que teñamos que proceder a desafiuzar e a reclamar os danos e prexuízos correspondentes ao Concello de Sarria, requirimos ao mesmo para que proceda á paralización e a retirar a obra ou instalación que está a executar no solar", sinala o escrito.
Solicita tamén a reposición do terreo ao seu estado anterior, coa supresión de bancos, xardíns e beirarrúas, e insta o Concello a deixar "de usar devandita propiedade coma se dun ben público se tratase". Segundo argumenta, estas peticións non pretenden "prexudicar os veciños de Sarria, nin moito menos", senón que veñen motivadas "pola actitude das persoas que ostentan os postos de responsabilidade en devandito municipio, pois nin solicitaron autorización, nin comunicaron en ningún caso a realización de obra ou instalación algunha, nin solicitaron permiso respecto diso".
O edil de obras, Diego López, explicou que as letras foron adquiridas cunha subvención da Mancomunidade de Municipios do Camiño Francés e que serán instaladas noutro punto da vila. "O terreo estaba cedido en falso como todo neste pobo. É unha pena, pero hai alguén empeñado en que non se faga nada", dixo.
