O goberno sarrián propuxo á Confederación Hidrográfica do Miño-Sil (CHMS) que redacte -previa realización dun estudo arqueolóxico completo- un proxecto para a posta en valor de Ponte Ribeira para que sexa de paso peonil e a construción á beira, augas arriba, dun novo viaduto para vehículos.
Así o comunicou este xoves nun pleno ordinario o alcalde, Claudio Garrido, por mor dunha moción do PP preguntando polo estado da tramitación das obras na infraestrutura e a rescisión do contrato coa empresa adxudicataria, entre outros asuntos.
Esta solución, dixo o rexedor, sería igual que en Pontevella, onde se mantivo a ponte orixinal como peonil e construíu outro viaduto para paso de vehículos. O rexedor sinalou que esta é a medida que considera "máis viable" e potencia o Camiño.
Esta iniciativa foi cuestionada pola socialista Pilar López e o popular José Antonio García. A primeira considérao "unha tomadura de pelo" e cre que non se respecta o plan hidrolóxico" e atrasará a construción do viaduto "un mínimo de tres ou catro anos". O PP tamén fixo fincapé na demora que isto provocará. "Estamos de novo non punto cero", opinou García, quen cuestionou que a CHMS financie dúas pontes.
En canto á instalación dunha pasarela provisional, o alcalde afirmou que solicitou unha reunión co delegado do Goberno en Galicia para abordar a posibilidade de que a instale o Exército.
Doutra banda, o pleno aprobou -cos votos en contra do PP e a abstención do PSOE- as asignacións a grupos políticos municipais. Será de 200 euros e outros 10 euros por concelleiro. O portavoz de Galicia Sempre, Benjamín Escontrela, comunicou que renuncia á metade da súa retribución por grupo ao ser un único representante, polo que sería de 100 euros, máis os 10 por concelleiro.
Estas asignacións foron moi criticadas por García pois afirmou que en Sarria nunca as houbo e insistiu en que será a corporación "máis cara da historia". "Custará 600.000 euros", insistiu. Durante o debate uns e outros se reprocharon os soldos cobrados no Concello e a Deputación.
Os demais partidos apuntaron que outros Concellos e a Deputación si dispoñen destas retribucións. "Non inventamos nada", dixo o nacionalista Efrén Castro, quen recordou que o uso deses fondos está "regulado por lei".
