O alcalde de Sarria, Claudio Garrido, instou este xoves á Xunta de Galicia a que garanta ante esta administración que a antiga Escola Fogar cumpre todas as condicións necesarias para acoller durante este próximo curso escolar a parte do alumnado do colexio Frei Luís de Granada.
Segundo dixo, a poucos días do inicio do período lectivo, o Concello non ten constancia de que esas instalacións reúnan os requisitos esixidos para a impartición de ensinos, polo que pediu a Educación "que cumpra e garanta a seguridade" xa que, pola contra, o Concello tería que tomar outras medidas e incluso podería non permitir a actividade.
Garrido insistiu en que a Escola Fogar non é un centro docente, senón que antigamente era utilizado como "internado" de alumnos. Segundo recordou, durante parte do último curso escolar acolleu aos nenos e nenas do colexio Frei Luís de Granada debido á aparición de gretas neste centro. "Aquilo foi unha urxencia, pero agora a consellería tivo tempo suficiente desde marzo ata setembro para planificar o novo curso e tiña que prever esta situación", opinou o rexedor, en alusión ás obras de rehabilitación que se farán no Frei Luís e que manterán este edificio inoperativo para impartir clases.
O alcalde explicou que desde o Concello solicitouse un informe técnico sobre a Escola Fogar, onde está previsto recolocar aos alumnos de primeiro, segundo e terceiro do Frei Luís. Ese documento, que foi remitido a Educación, sinala que "como paso previo á apertura do centro, a consellería competente en materia de educación deberá achegar a este concello comunicación previa de inicio de actividade, xunto coa memoria e a situación final do edificio, xustificando o cumprimento da normativa técnica de aplicación para este tipo de actividade ou as súas excepcionalidades".
Segundo o rexedor, a unha semana do comezo do curso escolar, o Concello non recibiu esa comunicación previa do inicio da actividade, polo que reclamou "que cumpra o que di a normativa".
O mandatario sarrián asegurou tamén que existe unha gran "inquietude" entre os pais e nais, que nalgúns casos exponse o traslado a outros centros, e engadiu que o Valedor do Pobo, a petición de varias familias, tamén pediu informe ao Concello sobre a recolocación.
