lunes. 17.01.2022 |
El tiempo
lunes. 17.01.2022
El tiempo

O Concello do Incio rehabilitará a palloza de Val do Mao que se derrubou

La palloza que colapsó en Val do Mao.
A palloza que colapsó en Val do Mao. AEP
A obra é custeada cunha axuda do GDR Ribeira Sacra-Courel, que tamén achega fondos para unha aplicación móbil para Triacastela

O Concello O Incio rehabilitará a palloza do campo da festa do Val do Mao que veu abaixo hai uns meses. As obras serán executadas con cargo a unha axuda do plan Leader que xestiona o Grupo de Desenvolvemento Rural (GDR) Ribeira Sacra-Courel.

A infraestrutura foi construída polos veciños fai unhas dúas décadas. Era utilizada como bar para as celebracións da parroquia, como as patronais de San Eufrasio, festas de Entroido e magostos, ademais de para organizar reunións ou outras iniciativas. A palloza foise deteriorando polo paso do tempo e hai varios meses colapsou.

As obras para rehabilitar a construción, a cal dispón dunha estrutura de madeira, contan cun orzamento de 18.250,75 euros, dos que o GDR achega o 70%, segundo informou o alcalde, Héctor Corujo.

A palloza foi construída polos veciños na primavera de 2003 en madeira e cunha cuberta vexetal. Estreárona en maio dese ano, nas patronais de San Eufrasio, para utilizala como bar para recadar fondos por parte da comisión das festas. O seu arranxo foi reclamado hai uns meses polo PSOE.

aplicación móbil. Na comarca de Sarria, ademais do Incio, forma parte do GDR Ribeira Sacra-Courel o concello de Triacastela. Neste caso o Concello recibiu unha axuda do plan Leader para o desenvolvemento dunha aplicación para o teléfono móbil de realidade aumentada para a promoción turística do municipio, tal e como indicou a alcaldesa, Olga Igrexas.

A actuación ten un custo de 6.999,85 euros e dispón dunha subvención de 2.400 euros, mentres que o Concello terá que achegar a contía restante.

A iniciativa é unha aplicación para que os peregrinos e turistas poidan coñecer un pouco máis deste concello situado en pleno Camiño de Santiago. Poderán acceder a vídeos e contidos para achegalos aos monumentos, pobos ou lugares do municipio.

Entre os proxectos aprobados polo GDR Ribeira Sacra-Courel figura tamén a posta en marcha por parte dun particular dunha pensión de tres estrelas en Triacastela.

O Concello do Incio rehabilitará a palloza de Val do Mao que se...
comentarios