O alcalde do Incio, Héctor Corujo, mantivo na xornada do xoves unha reunión co presidente da Confederación Hidrográfica do Miño-Sil (CHMS), José Antonio Quiroga, na que lle propuxo facer un uso recreativo do encoro de Vilasouto, converténdoo en navegable.
Esta petición aínda a ten que avaliar o organismo de conca, xa que o pantano se atopa baixo a súa xurisdición. Na proposta que o goberno presentou á CHMS especifícase que a navegación polo encoro terá que ser con embarcacións sen motor ou propulsadas mediante enerxía eléctrica, e, polo tanto, non contaminantes.
O rexedor considera que, deste xeito, as embarcacións que naveguen polo pantano non repercutirán de xeito negativo sobre a auga que utilizan algúns concellos limítrofes para o abastecemento, como é o caso de Bóveda. Anteriormente, algunhas parroquias do Incio tamén se fornecían deste recurso, ata que o Concello instalou a traída.
RECLAMO TURÍSTICO. Que a lagoa fose navegable podería converter ao Incio e os municipios limítrofes "nun punto de lecer acuático e, polo tanto, nun reclamo turístico", manifestaron desde o Concello. "Cremos que se trata dun proxecto con moitas posibilidades de lecer e deportivas, o que repercutiría non turismo da zona", explicou Héctor Corujo.
Entre as posibilidades que se barallan está a navegación de recreo a través de pequenas embarcacións, como piraguas, táboas de páddlesurf, windsurf, navíos de vela ou que funcionen mediante un sistema de pedaleo.
O alcalde recordou que o encoro de Vilasouto non se utiliza para produción de enerxía eléctrica,polo que "sería un enclave de excepción para a navegación de recreo".
O dirixente local agradeceu a disposición do organismo -dependente do Ministerio de Agricultura, Alimentación e Medio Ambiente- e do seu presidente, quen se ofreceu a colaborar co Concello do Incio para avanzar nas posibilidades recreativas do encoro, indicou o rexedor.
Así mesmo, tanto Héctor Corujo como José Antonio Quiroga acordaron seguir estudando "os condicionantes técnicos para poder levar a cabo o proxecto", segundo apuntaron desde o Concello.
OUTROS ACORDOS. Por outra banda, na reunión abordáronse outros temas relacionados co municipio, como o arranxo e limpeza de viarias que se atopan nas inmediacións do encoro.
O alcalde solicitou o mantemento das infraestruturas que son competencia do organismo de conca, entre as que se atopa a estrada que une Laiosa coa presa de Vilasouto. O Concello pediu que se mellore.
Este tamén reclamou que se roce a vía que conecta os núcleos de Vilasouto e Mosteiró.
