O Concello de Sarria contratará a seis operarios para limpar os ríos na vila e creará un paseo fluvial entre o Campo do Río e A Pontevella.
Os traballadores ocuparanse durante catro meses de limpar a maleza das canles do Sarria e o Celeiro e da zona de servidume dos ríos, así como de retirar as árbores enfermas e con risco de caer. Estas actuacións levarán a cabo no centro urbano e a ruta das Aceas.
O Concello xa iniciou a limpeza da zona de servidume do río entre o Campo do Río e A Pontevella para crear un paseo fluvial, actuación da que se encarga persoal municipal. Nun punto do percorrido terá que instalar unha pasarela, pero de momento deberase dar un rodeo.
Para limpar os ríos é necesario o permiso da Confederación Hidrográfica do Miño-Sil (CHMS). Este foi solicitado o 5 de decembro do pasado ano e a resolución da autorización data do 22 de xuño, séndolle notificada o 3 de xullo, explicaron o alcalde, Claudio Garrido, e o concelleiro de medio ambiente, Pedro López. Ademais, o Concello precisou autorización de Patrimonio, que tamén foi concedida.
A contratación dos seis operarios financiarase con cargo ao plan único da Deputación deste ano. Este programa foi aprobado pola administración provincial en marzo, aínda que estivo en 'stand by' pola pandemia do Covid-19 e os proxectos non recibiron o visto e prace ata xullo. Segundo indicaron os responsables municipais, unha vez que salga publicado no Boletín Oficial da Provincia, o Concello poderá contratar aos seis operarios.
"Existía unha planificación para limpar os ríos desde o minuto cero, pero o coronavirus e circunstancias administrativas e técnicas impediron facelo antes", manifestaron. Pediron desculpas aos veciños polo estado no que se atopan as canles e non poder comezar antes a limpar os ríos, que son "prioritarios na imaxe de Sarria e o benestar dos cidadáns".
O estado das canles provocou reiteradas queixas do grupo municipal do PP, quen denunciou que os dous ríos atópanse cheos de maleza e proxectan unha mala imaxe da vila.
