A Consellería de Educación iniciou os traballos de demolición previos á rehabilitación integral do colexio sarrián Frei Luis de Granada, onde apareceron gretas hai meses que obrigaron a recolocar ao alumnado.
Segundo este departamento autonómico, durante estes días tamén levarán a cabo unha serie de catas solicitadas polo Concello de Sarria co fin de certificar que o proxecto de obra contempla todos os reforzos de seguridade establecidos na normativa.
Unha vez conclúan as demolicións e as catas determinen no seu caso a idoneidade da solución proposta no proxecto, será o momento no que arranque a obra en si de rehabilitación, tal e como especificou a consellería.
A actuación, que recibiu a preceptiva licenza do Concello a finais de outubro, conta cun orzamento de máis de 1,2 millóns de euros e un prazo de execución de sete meses, de modo que terá que estar lista para o próximo curso escolar.
As obras levan un reforzo estrutural do edificio, onde xa se detectaron gretas no ano 2011. Suporán tamén o illamento da fachada e a substitución das fiestras, así como a mellora das condicións de accesibilidade e evacuación do inmoble, entre outros traballos.
Durante este curso, o colexio Frei de Granada estará inoperativo para as clases debido a esta causa, de modo que o alumnado deste centro de ensino público atópase repartido entre as instalacións do instituto Xograr Afonso Gómez e a antiga Escola Fogar. O estado desta última foi motivo de controversia ao suscitar queixas da plataforma en defensa do colexio e do BNG, que denunciou, en base a un informe do Concello, problemas de accesibilidade ou evacuación e falta de biblioteca, patio ou ximnasio.