Un vehículo de grandes dimensións que circulaba onte por unha pista municipal do lugar da Vilerma, na parroquia sarriá de Maside, tirou ao chan o cable de telefonía que permanecía amarrado á fachada dunha casa, onde tamén provocou danos.
O incidente ocorreu sobre as 16.30 horas, cando o automóbil impactou co tendido telefónico, ben porque este estivese demasiado baixo ou ben porque o vehículo superaba a altura. Como consecuencia do impacto, a áncora ao que estaba enganchado o cable tirou das pedras da parede da vivenda, que acabaron no chan.
Os donos da casa afectada descoñecen as características do automóbil e buscan ao condutor para esclarecer quen se fai cargo do arranxo. Así mesmo, ata o lugar achegáronse axentes da Policía Local de Sarria, que tamén intentaron contactar coa área de avarías de Movistar, aínda que non obtiveron resposta.