A finais dos anos 90 desapareceu o último cine de Sarria, aínda que o domingo os veciños recuperaron por un día este espectáculo. Foi un cine diferente, sobre catro rodas.
A iniciativa, organizada pola área de Cultura da Deputación Provincial de Lugo, permitiu aos sarriáns gozar das películas Os Goonies e Gran Torino. Estes filmes foron elixidos a través dunha votación realizada en días pasados en internet.
Preto de 400 persoas inscribíronse para asistir ás proxeccións. Na primeira delas completouse o aforamento, de 80 vehículos, cunha media de tres persoas por automóbil. Pola súa banda, na segunda sesión apuntáronse ao redor de 70 vehículos, cunha media algo inferior, segundo explicou o deputado de Deportes, o nacionalista Efrén Castro, quen tamén asistiu ás proxeccións.
Os filmes exhibíronse nunha pantalla led de 24 metros cadrados e o son transmitiuse por FM, polo que os asistentes puideron escoitar as películas a través das radios dos seus vehículos ou ben polos altofalantes.
UNHA IDEA "DIFERENTE". Unha parella que acudiu cos seus fillos asegurou que a iniciativa é "unha boa idea" e onte foi a "primeira vez" que tanto eles como os pequenos gozaron dun autocine. Para outros dous asistentes é unha iniciativa "diferente e interesante" nun "momento que non pódese xuntar a xente" pola pandemia do coronavirus, afirmaron mentres gozaban de Os Goonies.
A primeira película estivo dirixida ao público infantil. "Hai unha necesidade tamén de ter vos nenos entretidos, as actividades extraescolares reducíronse e hai moi poucas actividades que facer", apuntou o deputado de Deportes.
Efrén Castro destacou a "moi boa acollida" que tivo o autocine, "unha actividade cultural que se pode facer con risco cero" ao permanecer os asistentes no propio vehículo, no que só poden estar convivientes. Esta iniciativa tamén levou a cabo en días pasados en Lugo. O deputado sinalou que nas dúas localidades foi "un éxito" e moitos dos asistentes preguntáronlle se ofrecerán novas sesións de autocine. O deputado asegurou que esperan repetir a actividade.
