A Confederación Hidrográfica do Miño-Sil (CHMS) rehabilitará os desaugadoiros de fondo da presa da parroquia de Vilasouto, no concello de O Incio, unhas obras cun orzamento de algo máis de 1,2 millóns de euros (incluído o Iva).
Na actualidade os desaugadoiros atópanse compostos por dous condutos de 700 milímetros de diámetro e presentan deficiencias. A actuación, a cal terá un prazo de execución máximo de doce meses, busca que estes sexan "operativos e seguros", segundo figura no proxecto da obra. Deberán permitir regular os caudais achegados ao río e que a auga teña unha calidade "aceptable", é dicir, con materiais en suspensión limitados e que estea suficientemente osixenada.
Por iso, os traballos na presa consistirán na eliminación das válvulas existentes na cámara actual, substituíndoas por unha única comporta. Habilitarase unha nova cámara para instalar nela sendas comportas de saída de paso amplo con capacidade de regulación, explica o documento. Algúns dos traballos serán subacuáticos.
O organismo de conca sacou a licitación as obras e ten aberto o prazo para recepción de ofertas ata as 14.00 horas deste martes. Está previsto que o vindeiro xoves se reúna a mesa de contratación para abrir as propostas económicas das empresas presentadas.
DÚAS ANUALIDADES. A actuación na presa dividirase en dúas anualidades. Neste exercicio destinaranse a maior parte dos fondos (algo máis dun millón), mentres que en 2021 serán 255.000 euros.
Os trámites para levar a cabo estas obras comezaron hai anos, pois xa en 2011 a Confederación Hidrográfica do Miño-Sil adxudicou a redacción do proxecto. Este tivo un custo próximo aos 60.000 euros. Con todo, algúns dos traballos que contemplaba o documento fóronse acometendo ao longo dos anos, como figura no mesmo.
Ante iso, en novembro de 2018 o organismo contratou a outra firma a actualización do proxecto, que foi dividido en dous (a rehabilitación integral dos desaugadoiros da presa e, doutra banda, a renovación da válvula de garda e tratamento de tubaxes na toma de auga para o regadío). Por agora a Confederación Hidrográfica do Miño-sil sacou a licitación o primeiro deles.
