A Confederación Hidrográfica do Miño-Sil (CHMS) reserva unha partida de 200.000 euros para afrontar o pago das expropiacións que resulten necesarias para executar o proxecto de mellora do saneamento e a depuración no concello de Sarria.
As obras terán un custo total de tres millóns de euros, dos cales 200.000 serán para a obtención de terreos mediante expropiación, 180.000 para a redacción do proxecto, 2,5 millóns para os traballos en si e 100.000 euros para a asistencia técnica.
O proxecto xa foi adxudicado a Eptisa Servizos de Enxeñería e sufragarase con fondos desta anualidade. O groso do financiamento será o próximo ano, momento no cal a CHMS achegará dous millóns, quedando outros 800.000 euros para 2021, data prevista de finalización dos traballos.
O convenio entre a CHMS e o Concello para acometer esta actuación, asinado o pasado mes, acaba de facerse público a través do BOE. Contempla a mellora da rede de saneamento mediante a substitución das conducións actuais ou a súa rehabilitación, a eliminación de verteduras á canle e a construción de dispositivos de regulación das augas de tormenta, ademais do acondicionamento da estación depuradora de augas residuais (Edar).
Esta planta presenta problemas de funcionamento, xa que ten moitos anos e algúns equipos están obsoletos, de modo que a súa capacidade de depuración non é suficiente para toda a poboación conectada. A rede de saneamento tamén é insuficiente en varios puntos e algúns colectores discorren por lugares inapropiados. A todo iso únese o gran caudal de infiltración, que supón un sobrecusto de operación do sistema e reduce a eficacia da Edar.
