O futuro centro de interpretación de Cova Eirós de Triacastela, que se porá en marcha nun edificio cedido polo Xacobeo e coñecido como A Casona, contará con cinco espazos expositivos nos cales tamén se poderán ver restos óseos vos e ferramentas líticas atopados no xacemento.
O proxecto, que botará a andar este mesmo ano, terá un custo aproximado de 110.000 euros. Desta cantidade, a Deputación Provincial sufraga 31.000, que se destinarán á redacción do plan museolóxico, así como á creación dun catálogo, unha páxina web e guías sobre a cova.
Para financiar o resto da actuación, o Concello de Triacastela solicitou unha axuda de fondos Leader a través do Grupo de Desenvolvemento Rural (GDR) Ribeira Sacra-Courel, que pode chegar ao 90%, de modo que o Concello achegaría o 10% restante.
O centro de interpretación irá situado na Casona, un edificio de 210 metros cadrados situado nas proximidades do albergue de peregrinos. Terá un primeiro espazo de introdución á riqueza do patrimonio natural e cultural de Cova Eirós e o Paleolítico das Serras Orientais.
O museo abrirá no edificio coñecido como A Casona e mostrará pezas achadas na cova
Outra das salas estará dedicada ao glaciarismo e á importancia dos cambios climáticos que definen o Cuaternario. Unha terceira sala centrarase na fauna, polo que exhibirá algúns dos restos óseos máis representativos de Cova Eirós. De igual modo, haberá un cuarto apartado que ofrecerá unha visión enfrontada do Homo Sapiens e o Neandertal (ambos habitaron nesta cova), con ilustracións a tamaño real e unha mostra de tecnoloxía lítica do Paleolítico Medio e Superior.
A quinta sala expositiva achegará ao visitante información sobre a arte rupestre de Cova Eirós e, nunha segunda fase deste proxecto, contará cunha reprodución da cova, recentemente declarada como Ben de Interese Cultural.
Segundo explicou a alcaldesa, Olga Iglesias, a idea é iniciar os traballos deste centro de interpretación durante este mesmo ano, unha vez se coñeza a resolución das axudas do GDR. Deste xeito, estará en marcha ao longo de 2020 e poderá ser ampliado e mellorado da cara ao Ano Santo 2021.
Este espazo persegue, entre outros obxectivos, fomentar o coñecemento e a concienciación entre a sociedade sobre a riqueza do patrimonio prehistórico nas serras orientais, atraer novo turismo e ser un recurso máis no Camiño de Santiago.
