Un establecemento de telefonía móbil do centro de Sarria reforzou as medidas de seguridade mediante a colocación de bolardos diante do escaparate para impedir a comisión de roubos polo método da alunizaxe, isto é, encaixando un coche contra o cristal, tal e como sucedeu neste negocio o pasado outubro.
A tenda, situada no bulevar da rúa Calvo Sotelo, na zona máis céntrica e comercial da vila, foi asaltada na noite do 23 ao 25 de outubro, cun botín consistente en teléfonos móbiles e diñeiro. Os ladróns actuaron ás catro da madrugada e non conseguiron romper o cristal de seguridade (anteriormente pertencía a un banco situado no mesmo baixo) a pesar de golpealo cun extintor. Ao ver fracasado o plan inicial, subiron á beirarrúa cun vehículo aproveitando a ausencia de bolardos á altura dun paso de peóns e, dando marcha atrás, salvaron un chanzo e e impactaron contra o cristal.
Deste xeito, lograron abrir unha fenda polo cal accederon ao interior e apropiáronse de diverso material en cuestión de minutos para darse logo á fuga. Só os danos causados no cristal foron taxados nuns 3.000 euros.
IGUAL DISEÑO. Co obxectivo de evitar que volva suceder algo similar e ante a necesidade de protexer "os negocios" ante roubos, o responsable do establecemento adoptou a decisión de colocar uns bolardos diante do escaparate, nunha zona privada pertencente ao comercio, de modo que non invade a vía pública.
Tomouse a molestia de encargar uns bolardos iguais aos que existen na rúa, co "fin de non romper a estética"
Para iso, tomouse a molestia de encargar uns bolardos iguais aos que existen na rúa, co "fin de non romper a estética", explicou. Deste xeito, nos propios pivotes colocados polo Concello no bulevar puido ver o nome da empresa que os facía e encargar un modelo idéntico pero coa particularidade de que os seus levan ferro por dentro para reforzalos ante alunizaxes.
Esta medida, cuxo custo superou os 300 euros incluído a montaxe e a instalación, non foi a única adoptada polo empresario, que xa tiña alarma no negocio e que ampliou os sistemas de seguridade con máis sensores para previr novas accións delituosas.
O bulevar da rúa Calvo Sotelo é hoxe en día unha das principais zonas comerciais de Sarria, semipeanil, con beirarrúas máis anchas e un só carril de circulación. O feito de estar en pleno centro non disuade os ladróns, que o pasado ano tamén asaltaron un estanco a escasos metros da tenda de telefonía móbil empregando unha maza coa que romperon un cristal blindado.
Os comercios toman diversas medidas para reforzar a seguridade, sobre todo polas noites, despois de que as patrullas policiais nocturnas fosen suprimidas durante a semana hai xa máis de dous anos por falta de persoal para cubrir todas as quendas.
