O presidente da Federación de Caza de Lugo, Francisco López, asegurou que o campionato galego de caza do raposo, que se celebrou esta fin de semana nos municipios Láncara e Triacastela, que colectivos animalistas cualificaran como "unha aberración", foi "perfecto" e desenvolveuse en todo momento "coa lei na man".
En declaracións a Efe, Francisco López explicou que o campionato celebrouse "sen novidade algunha" e sen incidentes que destacar, porque só se desprazaron para interromper a actividade cinexética "24 ecoloxistas", coa excepción, ademais, de que "antes podían interromper unha batida, pero agora non poden facelo" porque "está prohibido".
En canto ás críticas a este campionato, afirmou que os cazadores xa están "afeitos" ás "mentiras" dos colectivos animalistas e insistiu en que esta proba se desenvolveu "coa lei na man".
Precisou que o cota de caza nos dous sectores, en Láncara e Triacastela, era de 85 exemplares de raposo para a tempada, pero non se abateu ningún, precisamente para que puidese celebrarse en ambos os municipios o campionato galego.
De feito, aclarou que no transcurso desta proba só foron abatidos "21 exemplares", moi lonxe da cota establecida "pola propia administración", en base "ao plan de ordenación", redactado coa supervisión dos técnicos.
Ao seu xuízo, os colectivos animalistas apóianse "en mentiras" para deostar a práctica cinexética, cando en realidade os cazadores están a realizar un "labor social importante" no control de especies como o xabaril.
