Cáritas Interparroquial de Sarria entregou o pasado ano alimentos a 399 persoas, segundo o balance da entidade, que se presentará o venres, ás 20.00 horas, nunha asemblea xeral.
Esta cifra supón un lixeiro descenso con respecto a 2016, cando axudou a 420. Do total de beneficiarios do pasado exercicio 67 foron nenos de ata oito anos de idade, 325 adultos e sete persoas maiores de 65.
O colectivo tamén asistiu con vales de alimentos a 142 familias, mentres que 60 recibiron axudas mensuais da fundación Amigos de Galicia. Entre estas últimas repartíronse 720 lotes. Ademais, dispensou 850 bolsas de comida.
Cáritas axudou en 2017 a dez familias coa compra de libros de texto, apoiou economicamente a outras 64 para facer fronte a gastos sanitarios, de luz, gas ou auga.
En 2017 a entidade benéfica axudou a dez familias coa compra de libros de texto, apoiou economicamente a outras 64 para facer fronte a gastos sanitarios, de luz, gas ou auga. Así mesmo, atendeu a 95 transeúntes e peregrinos. A través de Cáritas Diocesana de Lugo ofrece asesoría xurídica, da que se beneficiaron oito persoas.
O colectivo dispón na súa sede, situada no antigo centro de saúde, de roupeiro, no que asistiron a 201 veciños e repartiron máis de 6.700 pezas e obxectos.
Ao longo de 2017 desenvolveu diversas actividades, como cursos de empregados de fogar, de apoio escolar, cociña e español. Promoveu unha merenda solidaria, a operación quilo e un rastrillo, ademais de realizar unha campaña de recollida de tapóns de plástico en colaboración con Amigos de Galicia.
