O primeiro campionato de futbolín Concello do Incio celebrarase o 15 de febreiro no pavillón e repartirá máis de 2.000 euros en premios.
O torneo, organizado polo Concello coa colaboración de Lucus Recreativos, disputarase na modalidade de movemento. Contará con primeira, segunda e terceira categoría. Ademais, haberá premios para as dúas mellores parellas do municipio, que consistirán en cestas de produtos.
Os gañadores de primeira categoría recibirán 700 euros, mentres que os subcampións obterán 350. Os terceiro clasificados levarán 200 euros, os cuartos 100 e os quintos, sextos, sétimos e oitavos, 40 euros.
A parella campioa de segunda categoría será premiada con 250 euros e a subcampioa farase con 120. A que quede en terceiro posto percibirá 60 euros, a cuarta 40 e a quinta, sexta, sétima e oitava, 30 euros.
En terceira categoría galardoarán ás catro primeiras parellas. A mellor recibirá 75 euros, a segunda 35 e a terceira e cuarta 20. Para todas elas haberá trofeos e medallas.
A inscrición para o campionato está aberta e pódese realizar nos números de teléfono 982.42.70.14 ou 637.17.69.84. O custo será de 30 euros por parella.
O Concello xa organizou o día 29 un torneo de futbolín cuxos gañadores lograron a inscrición gratuíta para o campionato de febreiro. Naquela ocasión participaron 19 equipos, entre os cales venceron Manu e Suso, seguidos de Alejandro e Iván.
