A veciña da Coruña Claudia Rodríguez Rodríguez percorreu o Camiño de Santiago e ao seu paso por Sarria tivo que adquirir unhas botas para poder seguir. A coruñesa nunca esperou que esa compra en Peregrinoteca -tenda especializada en peregrinos- acabaría con premio, pois foi a gañadora do sorteo da campaña 60x1.000 da Asociación de Comerciantes e Empresarios de Sarria (Aces), coa que tivo unha hora para gastarse mil euros.
A muller atópase estes días de vacacións en Andalucía, polo que non puido desprazarse á vila e foi a súa nai, Carmen Rodríguez, a encargada de percorrer este sábado os comercios realizando todas as compras pola súa filla. "Foi unha sorpresa", afirmou a proxenitora sobre o sorteo.
As bases do premio establecían a condición de que debía empregar os mil euros nun máximo dunha hora, nun mínimo de sete das 29 tendas participantes na campaña e cun gasto que non podía superar en ningún caso os 250 euros por establecemento.
PARA TODA A FAMILIA. A nai da afortunada cumpriu as condicións a machada e incluso sobráronlle seis minutos para empregar o premio. Realizou compras para "toda a familia" e foron desde unha cadeira para o coche e varios xoguetes para a súa neta -filla de Claudia Rodríguez- ata roupa, electrodomésticos, un reloxo, calzado e unhas lentes de sol.
Para facilitar as compras a asociación de comerciantes puxo á súa disposición un vehículo clásico, que a trasladou " época de luxo de Hollywood", dixo. O coleccionista Gerardo García, de Oural, é o propietario deste vehículo, que chamou a atención dos viandantes ao seu paso polas rúas da localidade sarriá.
Carmen Rodríguez asegurou que foi un "luxo" poder gozar destas compras "sen ter que pagar". "Foi unha experiencia moi bonita, todo estivo perfectamente disposto", resumiu a muller logo de percorrer as tendas. Destacou que en todos os establecementos recibírona "de marabilla" e asegurou que lle gustaron moito", polo que, dixo, volverán de compras á vila.
