A cabalgata dos Reis Magos de Sarria provocará este domingo cortes en todo o centro e o reforzo da Policía Local, que contará para o desfile con seis axentes. As súas Maxestades partirán ás 18.00 horas da estación para percorrer Calvo Sotelo ata o cruce da Ciguñeira e continuar por Diego Pazos ata A Avenida. As carrozas seguirán por Benigno Quiroga e Curros Enríquez para chegar ao pavillón do Chanto, onde haberá unha chocolatada e recepción aos Reis Magos.
Isto provocará cortes en todas estas rúas, así como nas vías perpendiculares. A Policía Local solicitou a colaboración cidadá e que non se estacione no bulevar de Calvo Sotelo nin na marxe dereita de Curros Enríquez. Tamén se pide que os nenos vaian da man de adultos.
Os Reis Magos visitarán este domingo pola mañá a residencia de maiores e pola tarde, antes do desfile, estarán no Centro de Atención a Persoas con Discapacidade. Ademais, pola mañá percorrerán varias parroquias.
