O Ministerio Fiscal solicita seis anos de cárcere para o administrativo dunha empresa do moble de Sarria que está acusado de apropiarse, durante os catro anos que estivo a traballar na compañía, dunha cantidade próxima aos 140.000 euros desa sociedade.
O xuízo ía celebrarse este luns na Audiencia Provincial de Lugo, pero finalmente foi suspendido por incomparecencia do acusado.
De feito, fontes do Tribunal Superior de Xustiza de Galicia (TSXG) informaron de que o acusado está nestes momentos en situación de busca e captura porque se descoñece o seu paradoiro.
O Ministerio Fiscal sostén que o acusado aproveitou a súa posición na empresa e o seu traballo como administrativo para emitir un total de 125 cheques e pagarés a nome de Muebles LF que el mesmo cobrou, imitando a firma da administradora da empresa.
Posteriormente, ingresaba o diñeiro en contas correntes nas que el mesmo ou familiares directos seus figuraban como titulares.
Os feitos ocorreron entre os anos 1994 e 1998.
Segundo o informe pericial, o acusado obtería un "beneficio patrimonial ilícito" de 23.263.861 das antigas pesetas, equivalente a 139.818 euros.
Para o fiscal trátase dun delito continuado de falsidade en documento mercantil, en concurso cun delito continuado de estafa, polo que solicita para o acusado seis anos de cárcere e a devolución do diñeiro supostamente roubado.
