O bulevar da Rúa Calvo Sotelo, a rúa máis céntrica da vila de Sarria, reabriu este venres ao mediodía ao tráfico logo de ser sometida a strong <>obras de renovación do pavimento. Estas tiveron un custo de 60.830 euros.
Os traballos eran moi demandados polos cidadáns, pois o firme da vía e das zonas de carga e descarga atopábase en mal estado, con fochancas. A empresa adxudicataria, Grupo Bascuas 2008, ultimaba na xornada do xoves as obras co pintado do bulevar para poder abrilo o venres.
A actuación na vía, entre as cruces da Ciguñeira e Catro Camiños, consistiu na renovación do pavimento, o cal pasou de ser de asfalto a formigón. Isto prolongou os traballos durante un maior número de días, xa que son necesarios varios para fraguar o material. As obras completáronse co pintado, como os pasos de peóns, onde se instalaron balizas de chan luminosas e pilonas a cada lado co fin de mellorar a visibilidade tanto para peóns como condutores.
Os traballos prolongáronse durante tres semanas, pois permaneceu pechada desde o pasado 26 de setembro. Isto tamén provocou cortes de tráfico nas rúas adxacentes, como son Vázquez Queipo, Rías Baixas, Poula e Marquesa Casa López.
O Concello financiou a actuación con cargo ao plan único da Deputación Provincial de Lugo de 2018, polo que as obras deben estar xustificadas a finais deste ano. O Concello sacounas a licitación en outubro de 2018 por 70.000 euros, presentándose ao concurso dúas empresas e sendo adxudicataria por 60.830 euros (incluído o Ive) a empresa Grupo Bascuas 2008 ao obter a maior puntuación.
