Os bombeiros do parque comarcal de Sarria trasladáronse o xoves ata A Pobra de San Xiao, en Láncara, tras declararse un incendio nas vías do tren de pequenas dimensións.
O suceso tivo lugar ao redor das seis da tarde cando unha travesa de madeira que cruza a vía ardeu. Crese que o incendio foi provocado por unha faísca derivada dos traballos de retirada de sinalización na antiga vía do tren, que se acometen estes días. A liña do ferrocarril ao seu paso pola Pobra quedou en desuso hai uns meses debido á entrada en servizo da nova variante da alta velocidade desta localidade.
Ata o lugar desprazáronse dous camións cisterna que sufocaron o incendio nun curto período de tempo, ao redor de dez minutos. Dada a localización non houbo que lamentar danos materiais nin persoais.
O incidente produciuse nas proximidades dun dos antigos pasos a nivel, na rúa Benigno Quiroga. Trátase, en concreto, do primeiro no acceso á Pobra desde Lugo.