Os bombeiros do parque comarcal de Sarria foron mobilizados onte, xunto con traballadores do Concello e axentes da Policía Local, para retirar un niño de avispa velutina situado a gran altura nunha árbore da Rúa Peregrino, nun punto céntrico da vila.
A intervención produciuse sobre as once da mañá, para o que foi preciso despregar a escaleira dos bombeiros ata alcanzar o niño, a uns 15 metros de altura. Da súa retirada encargáronse traballadores da brigada municipal de medio ambiente axudados por un bombeiro mentres que a Policía ocupouse de regular o tránsito na zona.
O alcalde de Sarria, Claudio Garrido, volveu denunciar onte o gran aumento no número de niños detectados no municipio, moitos deles no centro urbano, así como a falta de medios suficientes para facerlles fronte.
Segundo explicou, na mañá de onte foron outras nove as alertas recibidas no Concello pola presenza de velutinas, que veñen sumarse ás nove rexistradas o pasado mércores, de modo que o total no que vai de verán supera xa os 90 avisos en Sarria.
No caso do niño da Rúa Peregrino foi precisa a participación dos bombeiros ao carecer os efectivos municipais doutros medios para chegar a determinadas alturas. Ademais, "era un niño moi grande" e estaba localizado nunha rúa pola que transitan non só veciños senón tamén os numerosos peregrinos que se dirixen cara a Compostela polo Camiño Francés, engadiu.
Garrido reclamou á Xunta de Galicia que "asuma as súas competencias" nesta materia porque, segundo manifestou, o Concello vese sen axudas para loitar contra "esta grave praga". As alertas pola presenza de niños de velutina no municipio sarrián son "un goteo continuo" e non se limitan só ao período de verán, senón que se suceden ao longo de todo o ano.
