O campionato de caza de raposo previsto para este fin de semana na zona do Oribio —nos municipios de Láncara e Triacastela— segue sumando detractores. Este mércores fixeron públicas as súas críticas Libera e Adega, e este xoves evidenciáronas BNG e Federación Rural Galega (Fruga).
O colectivo reclamou á Xunta a paralización da convocatoria, nunha área que subliña que está afectada pola proliferación da rata toupa e cuxa situación alerta de que se agravaría" coa batida de raposos. "Precisamente, é o raposo o principal elemento de control biolóxico desta especie de roedores, polo que unha cacería como a que se propón serviría para agravar aínda máis a situación e facilitar aínda máis a proliferación descontrolada da rata toupa", alerta Fruga nun comunicado.
Con esa base, a federación atribúe unha "irresponsabilidade" á Administración galega, que, "ao tempo que se amparan certames coma este", promete "acometer medidas, a día de hoxe aínda por determinar, e evita dotar presupostariamente de axudas ás explotacións afectadas polos roedores".
PARLAMENTO. O BNG mentres, decidiu levar ao Parlamento a autorización do campionato, "tras a dimisión do xefe provincial de patrimonio natural de Lugo que previamente cancelara o do 11 de xaneiro en Monforte". Así as cousas, o deputado do Bloque Luís Bará rexistrou unha batería de iniciativas para "coñecer as razóns" polas que se permite un e se anula outro. E preguntarán se a renuncia do xefe provincial está relacionada co tema.
Ao mesmo tempo, os nacionalistas subliñan o seu rexeitamento á "matanza indiscriminada e competitiva" de raposos e demandan á Xunta que prohiba unha actividade que considera "irracional". "Matanzas disfrazadas de pseudoprobas deportivas", di, para chamar a iniciar cambios normativos que as impidan.
Subliña, nesa liña, que o Parlamento aprobou en 2018 unha iniciativa instando o Goberno a non apoiar os campionatos de caza de raposo.
