Sensibilizar aos novos alumnos sobre a importancia da orde, a limpeza e o coidado do seu instituto foi a razón que levou ao Xograr Afonso Gómez de Sarria a pór en marcha un concurso co que se premiou aos estudantes que contan coa aula máis limpa e coidada.
A iniciativa, bautizada como Coidemos o noso centro, levouse a cabo no instituto por segundo ano consecutivo. Neste curso desenvolveuse durante o primeiro trimestre e participaron as aulas de primeiro, segundo e terceiro de educación secundaria obrigatoria, entre as que resultou gañadora a de segundo de Eso B. Os alumnos desta clase recibiron como premio obsequios que foron doados pola Sociedade Galega do Medio Ambiente (Sogama).
Para o concurso contouse tamén coa colaboración do persoal de limpeza do centro educativo, que todos os días, pola tarde, unha vez finalizaban as clases, avaliaron "como estaba de limpa e ordenada" cada aula, explicou este martes o director do instituto, José Manuel Valcarce López.
Ao finalizar o primeiro trimestre reuníronse todas as valoracións e a clase que recibiu a mellor nota foi a gañadora do concurso. Os alumnos de segundo de Eso B teñen así "o orgullo de poder dicir que a súa aula é a máis limpa" de todo o instituto, indicou o profesor, quen destacou que con este certame os mozos están "máis concienciados" de coidar a súa clase.
SENSIBILIZACIÓN. A iniciativa quere sensibilizar aos estudantes da importancia da orde, a limpeza e o coidado duns materiais e unhas instalacións que son de todos. Con este curioso concurso o IES Xograr Afonso Gómez tamén busca fomentar a responsabilidade e promover o traballo cooperativo. Coidemos o noso centro naceu ante condutas que se viven nos centros, como tirar papeis no chan no recreo ou nas aulas, explicou o director do instituto. "É unha campaña de sensibilización. Os alumnos están moitas horas nas aulas e están mellor, máis cómodos, cando se encontran limpas e tratan ben as instalacións", engadiu.
Segundo sinalou, o certame é unha forma de que os estudantes estean "máis concienciados", de que se privasen de estar "ensuciando de forma innecesaria" e que as clases estean "máis ordenadas e limpas", tratándoas coma se fosen as súas propias vivendas.
"Senten como algo máis deles a aula", manifestou José Manuel Valcarce. Puxo como exemplo as cortizas das clases, que se atopaban garabateados de varios cursos e os estudantes encargáronse de adecualos eles mesmos. Os alumnos de catro "ou cinco" aulas, por iniciativa propia, pintáronos o pasado ano co obxectivo de tapar os debuxos realizados en cursos pasados nas cortizas. "Empezaron a sentir a aula como súa", subliñou o director.
RECICLAXE. Ademais deste concurso, o instituto sarrián puxo en marcha outras iniciativas para fomentar a reciclaxe para "non consumir recursos innecesarios e non contaminar", indicou. Desta forma busca promover o aforro enerxético e de papel.
Desde Sogama fixéronse eco do certame Coidemos o noso centro que puxo en marcha polo Xograr Afonso Gómez e destacaron a preocupación do instituto polo coidado do medio ambiente. Trátase dun "dous primeiros centros que mostrou interese en coñecer" o funcionamento desta sociedade, cando comezou o programa de visitas ás súas instalacións, indicou a entidade na súa páxina web.
A Sociedade Galega do Medio Ambiente recoñeceu tamén outras iniciativas creadas polo instituto, como Radio Xograr ou a rede de alumnado axudante do centro. Esta última atópase integrada por estudantes que se forman para axudar a compañeiros con dificultades, como de integración, convivencia e problemas persoais, entre outros. Outra das actividades do centro educativo na que fixo fincapé Sogama foi a campaña solidaria "Agasallo un libro, un CD, unha película, suxiro outra...", posta en marcha para recoller doazóns para Cáritas Interparroquial de Sarria co fin de entregalas ás persoas máis necesitadas da zona, apuntou a sociedade autonómica.
