As forzas de seguridade localizaron na mañá deste martes a unha moza veciña da Pobra de San Xiao, que se atopaba en paradoiro descoñecido desde o día anterior e que era buscada tanto na capital lucense como no municipio de Láncara.
Segundo diversas informacións, o operativo púxose en marcha despois de que a moza, de 30 anos, difundise unha publicación nas redes sociais cuxo contido fixo saltar as alarmas entre quen a leron.
A moza, localizada finalmente en bo estado, reside na capitalidade lancaresa desde hai un tempo, aínda que tamén consta un domicilio seu en Lugo.
Por este motivo, os intentos para dar co seu paradoiro mobilizaron tanto a axentes da Policía Nacional como efectivos da Garda Civil, que solicitaron a participación dos primeiros para o rastrexo na cidade de Lugo mentres eles facíanse cargo da procura na zona do concello de Láncara e limítrofes.
O operativo comezou xa o pasado luns e prolongouse ata a mañá de este martes, momento no cal unha patrulla da Benemérita localizou á moza nas inmediacións da antiga gasolineira de Maceda, no límite entre os municipios de Láncara e O Corgo, onde ao parecer atopábase no interior dun vehículo.
A veciña foi trasladada ao hospital Lucus Augusti para ser sometida a unha revisión médica.
O pasado mes de xullo tamén se despregou un amplo dispositivo para atopar a un empresario de Sarria ao que se lle perdeu a pista na súa nave de Vilapedre e que finalmente foi localizado tras máis de 24 horas de rastrexo nas proximidades das instalacións en estado de desorientación.
