A Asociación de Mulleres de Paradela resultou premiada o pasado domingo no transcurso dun encontro celebrado en Melide para conmemorar o Día Internacional da Muller. O colectivo que preside Rocío Domínguez obtivo un recoñecemento polo seu traballo e a unión entre mulleres do ámbito rural.
Fundada hai doce anos, esta asociación realiza un intenso labor durante todo o ano, no que organiza desde cursos ata excursións ou comidas, actos abertos á participación non só das socias senón tamén doutras persoas que queiran sumarse.
A súa próxima actividade será o fin de semana do 28 deste mes, datas nas cales viaxará ata Cantabria para gozar dunha visita ao parque de Cabárceno e a cova O Soplao, entre outros lugares de interese da comunidade.
O colectivo tamén ten en marcha clases de pilates e de manualidades. Na actualidade son unhas 200 as mulleres de Paradela que forman parte desta asociación, que cada ano expón os seus traballos no centro sociocultural Manuel Oreste Rodríguez López con motivo da celebración da Feira de San Isidro.
