Cestos, pratos, cinceiros, petos, chaveiros ou marcapáxinas exhíbense durante este mes no Museo do Pan do establecemento Pallares de Sarria. Todos eles son artesanais e foron elaborados polos residentes do Centro de Atención a Persoas con Discapacidade (CAPD).
Os internos encárganse de realizar estas obras nas aulas e os talleres, dos que gozan todos os días para "estimular e potenciar as súas capacidades", explica o director do centro, Luis Pardo.
Educadores e mestres imparten estes obradoiros, dos que gozan "sobre o 60 por cento" dos preto de 120 residentes que ten o CAPD. Entre as actividades que lles ofrece o centro atópase a cerámica, coa que elaboran pezas eles mesmos, coa axuda dos educadores, e decóranas con cristal reciclado procedente de botellas. "Hai un residente cego ao que lle encanta moldear o barro", apunta o director durante unha visita á exposición cos propietarios da panadería, Pilar García e Javier Fernández.
Os alumnos tamén gozan de talleres de cestería e algunhas das pezas que prepararon pódense ver na mostra. Esta acolle, ademais, chaveiros, imáns e marcapáxinas "tecidos con plástico", así como petos realizados con botes reutilizados. "Todo se fai con material reciclaxe", engade.
AULAS. Os residentes van rotando por estas aulas "cada media hora ou cada tres cuartos de hora" e participan en cada ocasión cinco ou seis residentes. Así durante toda a mañá e a tarde. Os participantes están "encantados". "Dentro da súa discapacidade teñen as súas capacidades e intentamos estimulalas e fomentalas", indica o director do CAPD. Luis Pardo agradeceu a implicación dos empregados do centro, así como aos propietarios da panadería por acoller a exposición.
A mostra permite dar a coñecer o traballo que realizan no CAPD, que é "un gran descoñecido" na localidade e o director invitou os veciños a coñecelo. "Está aberto a que vaian visitalo os veciños", engade Luís Pardo.
A exposición permanecerá no museo ata despois das festas de San Xoán e está a gustar "moito" aos veciños e visitantes, afirman Pilar García e Javier Fernández, que, con iniciativas como esta, queren "poñer en valor o que se fai na vila".
Actividades
Segundo indica o director, aos residentes gústalles participar nas actividades e facelas fóra do centro. Os internos toman parte en actos da vila organizados polo Concello ou asociacións, como o desfile de disfraces de Entroido ou feiras.
O CAPD celebra xa o próximo outubro un cuarto de século. Como cada ano, organizará unha festa e unha mostra cos traballos dos internos. O centro conta con 120 prazas de residentes e 172 traballadores directos.
