A Consellería de Política Social acaba de autorizar a creación de dúas novas Casas Niño para favorecer a conciliación laboral e familiar en Láncara e Samos. Estes servizos, cofinanciados con fondos europeos, diríxense a menores de 0 a 3 anos de idade e son gratuítos para as familias.
No caso de Láncara, trátase da segunda Casa Neno do municipio, onde existe unha alta demanda deste tipo de prestación. Gemma Fontenla Campos é a promotora do proxecto, que leva por nome "As pegadas máis enxebres" e cuxa localización está prevista en parte das instalacións do polifuncional do campo da feira de A Pobra de San Xiao.
A posta en marcha desta nova Casa Niño motivou tanto unha recollida de firmas como un pleno extraordinario, tendo en conta que había un proxecto inicial para o antigo centro de saúde da Pobra, localización descartada polo Concello, que logo expuxo como alternativa o polifuncional.
Polo que respecta a Samos, a Casa Neno é unha iniciativa de Estela Parajó Naveira baixo a denominación de "Axóuxere". Nun primeiro momento tamén se propuxo a súa apertura nos baixos do edificio do centro de maiores do Concello, pero tivo que ser descartada ao estar considerados terreos inundables por parte da Confederación Hidrográfica do Miño-Sil (CHMS). Segundo apuntou o alcalde, Julio Gallego, optouse entón por situar o servizo nunhas aulas do colexio público de Samos, cuxa desafectación será solicitada polo Concello á Consellería de Educación.
A Xunta de Galicia recibiu outra solicitude para abrir unha Casa Neno neste mesmo municipio e no mesmo local, promovida por Ana López López co nome de "O señor Pérez". Esta petición quedou na reserva e recibirá subvención en caso de renuncia da anterior, segundo especifícase na resolución da Consellería de Política Social, publicada o pasado venres no Diario Oficial de Galicia.
As persoas beneficiarias das axudas dispoñen agora de dous meses de prazo para acreditar o acondicionamento dos inmobles conforme á normativa.
