Os visitantes e peregrinos poden durmir en strong <>Sarria entre obras de arte, unha iniciativa duns pisos turísticos que acollen exposicións para dar a coñecer a artistas e os seus traballos.
Apartamentos turísticos By House é o promotor desta idea, aberta tanto a artistas da zona como doutros lugares. "Queremos que peregrinos e visitantes coñezan algo máis. Estar nunha estancia con arte é un plus", sinalan as responsables destes aloxamentos, Soraya García Branco e Ana Toirán Somoza.
O proxecto acaba de comezar nun dos once apartamentos dos que dispoñen en Sarria, pero a idea é estendela a outros. A primeira artista que exhibe os seus traballos é a pintora segoviana Esther Román, que Soraya García coñeceu a través das redes sociais. "Falando con ela xurdiu a idea de mostrar arte no Camiño", conta. E desta forma naceu a iniciativa, bautizada como 'By House Art'. "Hai que buscar cousas novas, ofrecer algo distinto aos visitantes", opinan.
Nesta pequena mostra exponse unha decena de obras da artista, quen utiliza as técnicas de acuarela, acrílico e óleo. Os seus traballos caracterízanse "pola súa forza, colorido e vitalidade". "Son obras con moita personalidade e unha atrevida combinación de formas, cores e personaxes". Así definen os seus traballos nunhas follas informativas que os hóspedes atopan nos seus aloxamentos para coñecer un pouco máis á artista. Nelas tamén se describen as obras que se exhiben.
Á VENDA. Ademais, inclúense os prezos dos cadros, pois as pinturas están á venda. A aqueles que o desexen envíanlles as obras ás súas propias casas para que, como os peregrinos, non teñan que cargar con elas. "Pódeschas levar para un agasallo, non levar así o típico, ou para ti mesmo", apuntan.
'By House Art' é "como un escaparate para os artistas". "Coñecen as súas obras e se cadra anímanse a ir ver máis traballos do artista, a coñecelo máis e comprar agora ou no futuro", din. As promotoras esperan que se animen máis, de todas as disciplinas, desde pintura ata escultura ou artesanía. "Os artesáns son os grandes esquecidos e estamos abertas a calquera tipo de obra. A arte en Sarria e noutros lugares está pouco publicitado e esta é unha oportunidade", indican Soraya García e Ana Toirán. Estas animan aos artistas que desexen exhibir os seus traballos a porse en contacto con elas.
O apartamento que acolle a exposición de Esther Román tivo o pasado fin de semana aos primeiros hóspedes que puideron gozar da iniciativa. "quedaron alucinados, impactados de ver obras orixinais. Dá un plus, é algo orixinal e encantoulles, pareceulles unha idea buenísima", aseguran as responsables dos aloxamentos. elas puxeron en marcha os apartamentos este ano. A súa previsión era comezar en marzo, aínda que coa pandemia atrasouse ata verán.
