A polémica rodeou este xoves as obras de desmantelamento da antiga vía do tren da Pobra de San Xiao. O alcalde de Láncara, Darío Piñeiro, atrancó un camión para impedir que saíse o material porque, asegurou, o Administrador de Infraestruturas Ferroviarias (Adif) "prometeu" cedelo ao Concello e leváronllo particulares. Pediu ao organismo que aclare a quen pertence.
Desde hai días, unha empresa realiza o tratamento dos restos das travesas e cascallo, que foron sometidos a un proceso de triturado cunha máquina. Unha vez machucado, quedou unha especie de grava miúda, parte da cal foi vendida a particulares por esta firma. Segundo a empresa, Adif contratouna para desfacer estes restos e separar o ferro, sendo agora da súa propiedade todo o material obtido.
O rexedor alegou que "hai tempo" que o organismo estatal trasladou aos concellos polos que discorría a antiga vía que os restos, como a pedra, serían para as propias administracións locais. "Acordamos que cada Concello levara ou material do seu territorio", insistiu Piñeiro.
UTILIZACIÓN. Esta especie de grava miúda podería ser utilizada, por exemplo, para arranxar camiños "e o que fixera falla". Tamén podería ser preciso deixala no lugar para a creación da senda verde proxectada nas vellas vías. "Hai zonas nas que temos que reencher. Habería que estudalo antes de sacar ou material porque posiblemente houbera que deixalo onde estaban as vías", explicou.
Piñeiro considera que Adif debería dar unha explicación ao Concello. "Paréceme ben que decida vender ou material, pero que nos diga ao Concello que ou fai, que non comentase que ou daba", manifestou, molesto pola situación.
Segundo a súa versión, da antiga liña do ferrocarril saíron "como mínimo oito ou nove" bañeiras co cascallo, polo que "xa queda pouco". Os compradores comezaron a retiralo o mércores e continuaron este xoves, sinalou.
Ante esta situación, e á espera de recibir unha resposta do Administrador de Infraestruturas Ferroviarias, o alcalde optou ao mediodía deste xoves por atrancar un camión do Concello.
Atravesouno na entrada dun camiño polo que os vehículos pesados accedían para cargar a mercancía, xunto á antiga estación e outras construcións do tren. "Non deixo saír máis material", afirmou Piñeiro. Pola tarde o camión continuaba atravesado. O rexedor asegurou que permanecería alí ata que Adif "dea unha explicación". Si permitiu a entrada dun vehículo pesado para a retirada de restos de ferro.
Este xornal púxose en contacto co Administrador de Infraestruturas Ferroviarias para coñecer a súa versión, aínda que non obtivo resposta. Pola súa banda, a empresa que fixo as obras, que di ser a dona do material, optou por deixar no lugar os restos que quedan.
