A asociación cultural Rúa da Música organizará o próximo 14 de setembro en Sarria o festival Garitosis, que na súa novena edición reunirá a seis grupos.
O colectivo presentou o programa do evento durante unha festa que tivo lugar na praza da igrexa de Santa Mariña. Celebración que contou, na sesión vermú, con The Wireless
O festival, que é de entrada gratuíta, desenvolverase ao longo de todo o día. Será presumiblemente na Praza da Vila, aínda que a súa localización non está pechada. Dará comezo cunha sesión vermú, mentres que pola tarde haberá actividades para nenos. O certame pecharase pola noite con concertos.
Garitosis naceu hai nove anos para "crear un espazo onde puideran tocar os grupos sarriaos que ensaian e forman parte da Rúa da Música, dando a coñecer a actividade e a creación musical da asociación", explicaron desde o colectivo. Nesta edición as bandas locais serán Malditos Roedores, Acapulpo 94 e Louband.
Segundo recordaron desde a entidade, o festival "foi crecendo, diversificando os seus estilos e contando coa participación de grupos que xa pasaran polo local da asociación previamente". Nesta ocasión será o caso de TanDub, formación ourensá que naceu do encontro entre músicos de Galicia e Marrocos.
O programa completarase con Mad Martin Trío e Stephen Dálle Petit. O primeiro grupo debutou en 2014 co disco It was a very good year e un ano máis tarde foi o gañador en Madrid do concurso Azkena Rock Party. Pola súa banda, Stephen Dale Petit é guitarrista, cantante, compositor e músico de blues nacido en California e residente en Londres.