Todos coincidían este martes en destacar "a sorte" da condutora dun turismo que foi arroiado na noite do luns por un tren viaxeiros nun paso a nivel da estrada de Vilapedre a Céltigos, en Lousadela (Sarria). "Salvouse por un segundo", aseguraron.
O sinistro produciuse sobre as 22.10 horas, cando o coche circulaba en dirección Céltigos. A condutora non se decatou da chegada do tren e o vehículo foi alcanzado pola parte traseira, o que salvou á muller. Tal foi o impacto que "deulle a volta" e quedou en sentido Vilapedre, explicaron este martes veciños, quen aclararon que nese momento funcionaban os semáforos que alertan da chegada do tren.
"Volveu nacer. Salvouse por un segundo, pasa un segundo despois e o tren colle o coche polo medio", apuntaba unha residente na zona. A condutora, veciña do municipio de Lugo, saíu ilesa do accidente, aínda que atopábase en estado de shock. Un familiar asegurou este martes que está ben e que levou un gran susto.
Tampouco resultaron feridas as dúas persoas que viaxaban no tren, o cal estivo parado unha hora. O sinistro tamén obrigou a cortar ao tráfico de vehículos a estrada de Vilapedre a Céltigos.
Unha veciña recordou que hai uns anos ao seu marido calóuselle a súa furgoneta cando se aproximaba o tren
Ante este sinistro os veciños recordaron este martes outros accidentes ocorridos neste paso a nivel e a necesidade de que sexa suprimido. Rememoraron que fai máis de catro décadas houbo dúas vítimas mortais, dous médicos que estaban a realizar unha campaña de vacinación.
Segundo explicaron, tamén houbo atropelos de animais e producíronse "sustos, nos que non colleu a coches por segundos". Unha veciña recordou que hai uns anos ao seu marido calóuselle a súa furgoneta cando se aproximaba o tren, aínda que logrou sacala antes de ser alcanzado polo convoi.
O paso a nivel de Lousadela é un dos 36 que o Administrador de Infraestruturas Ferroviarias (Adif) proxecta eliminar na provincia de Lugo, 14 deles no municipio de Sarria.
Neste caso construirase unha ponte nas proximidades. Os veciños reclamaron que na zona na que está na actualidade o paso a nivel crese outro para os peóns, xa que se non terán que dar un rodeo para acudir, por exemplo, ás súas leiras.
O paso a nivel de Lousadela ten un gran tráfico de vehículos, xa que cada día circulan decenas de camións dunha fábrica de auga moi próxima.
